الثلاثاء، 3 فبراير 2009

انت الرابح هالشهر وكل شهر وطووول عمرك بعد


السلام عليكم ورحمة الله وبركاته،،
تحية طيبة وبعد،،
الى السيد/ مدير إدارة الشئون .......... <<<<< حنيت على الدوام وقرائتي حق هالصيغ من الكتب هههههههههه ادري اني مو صاحية بس شسوي صارلي شهر الحين برة الدوام لان عندي دورة

مالكم شغل بالحجي اللي مكتوب فوق ^^^^ لان حده فيوزاتي ضاربة

ماعلينا من اللي انقال ونرجع حق موضوعنا المهم...

محد فينا مايحب يزيد من معرفته
ومحد فينا مايحب ان يكون اهوا اللي عارف كل شي ويجاوب على كل صغيرة وكبيرة عشان يبرز نفسه جدام الكل في شتى المواضيع
ومحد فينا مايحب ان الناس اتكلم عنه في كثرة معرفته لجميع الأمور..

مثل ما انا احب اني أفيد نفسي وأستفيد .. هم انا احب اني أفيدكم وياي

يا حلاة الشعور لما تقعد بين ناس ويتناقشون في موضوع معين وانت تدش وياهم بهالموضوع وتتناقش فيه وتبرز فهاميتك لهالموضوع
لكن اللي مو حلو انك تقعد بين ناس جنك طوفة عبيطة وساكت ومالك حس وماتدري شنو قاعد يسولفون عنه

الصراحة اليوم يايبتلكم خوووووش موقع
اعتبره انا كنز كبييير من المعلومات والمعارف
من خلاله الواحد يقدر يتعرف على اشياء كثيرة مايدري عنها من قبل
وهم من خلاله الواحد يقدر يدافع عن دينه وعقيدته وسنة نبيه
وهم يقدر ان يرد بكل ثقة واعتزاز لما يتناقش بهالموضوع مع ناس ملحدين او ديانتهم غير عن ديانتنا
وهم من خلاله راح يزيد ايمانه بالله سبحانه وتعالى اكثر واكثر

هالموقع فيه إفادة وإستفادة وزيادة علم بأمور دينا وسنة نبينا عليه الصلاة والسلام
هالموقع راح يفيد الكل، الكبير منهم والصغير
وان شاء الله تستمتعون باللي فيه
وان شاء الله تدعونلي عقب ماتستفيدون من هالموقع الحلو اللي حطه الدكتور عبدالدائم الكحيل يزاه الله الف خير والله على هالموقع العجيب
وعليكم بالعافية