تفكر ولو قليلا

عساكم عالقوة جميعا وعسى الله يعطيكم الصحة والعافية حق اللي عطى من عمره وتعب خلال هالسنة وهم حق البطاليين والعطاليين اللي فاخيين طول السنة بالنوم واللعب والنت والتلفزيون

بما ان السنة اليديدة باجر والسنة الهجرية كانت قبل جم يوم فأقولكم كل عام وانتوا بخير ان شاء الله وعسى الله يجعلها سنة خير وراحة وزيادة عبادة حق الجميع

بما ان الناس كلها مشتطة على هالكريسماس والتلفزيونات الكويتية والعربية تتكلم عن هالعيد المسيحي والاسوقة تبيع بسوالف الكريسماس ومن الحرة اللي فيني واشوفها جدامي فأبي اعرف ان شكو المسلمين بهالسالفة

يعني انتو يالكويتيين شلكم بعيد الكريسماس؟؟ شنو يصيرلكم عشان تحتفلون فيه؟؟

اشوف عيد الاضحى والفطر محد فيكم استانس جذي وتزهبله وعدّل وسنع حقه مثل ماتتسنعون وتتعدلون حق الكريسماس

ليش الناس جنهم يايين من كوكب ثاني ومايعرفون يفرقون بين دين الاسلام ودين المسيحية؟!! يعني مايعرفون يفرقون ان دين الاسلام له عيديين اللي اهما عيد الفطر وعيد الاضحى وان دين المسيحية عندهم اكثر من عيد اللي اهوا عيد الكريسماس وعيد الفصح وعيد الميلاد وعيد القيامة وعيد الفالنتاين وغيره وغيره من الاعياد اللي ماتخلص واللي الله ما أمر فيها!!

ليش دايما الناس يسوون نفسهم جنهم قليليين إيمان او جنه معرفتهم بدينهم سطحية؟!!

في وايد ناس يدرون ان هالاعياد ما لها شغل فينا وبدينا وفوق هذا يحتفلون فيهم

اذا الواحد يدور الوناسة من خلال هالاعياد فأنا اقول ان الواحد يقدر يدور الوناسة ويحتفل بأي يوم من أيام السنة بدون ما ان يحتفل فيها بأيام الاعياد المسيحية

شغله ثانية ودي اقولها ان الواحد او الانسان المسلم لما يحتفل بهالاعياد خل يعرف ان فعلته هذي ترى تدل على انه يأيد هالشي ويشجعه وراضي عنه ان يصير حتى اللي يهنون بعض بهالعيد ويحتفلون معاهم بهالعيد سواء هالاشخاص المسيح يعزون عليك او وياك بالدوام او حتى يصيرونلك فهالشي ترى حرام وذلك لان جنك تهنيه لسجوده حق الصليب وحق ديانته المسيحية

وللعلم ترى المسيح لي شافوا المسلمين يهتمون بهالاعياد ويحتفلون فيها ويهنونهم عليها يخليهم يستانسون ويفرحون من داخل ان اقدروا ان يغيرون شي بسيط في المسلم

حتى الرسول عليه الصلاة والسلام قال" من تشبه بقوم فهو منهم " يعني اذا بتهني وتحتفل بهالاعياد فهذا دليل على انك واحد منهم

هم في حديث ثاني يقول بما معناه يعني ان يبعث الناس يوم القيامة مع من يحبون

فمنو المسلم اللي يحب يكون مثل ربعه المسيحين ويبعث وياهم يوم القيامة؟!!!

الكل يتمنى ان يبعثون مع المؤمنيين وشيوخ الدين والصديقين، اما اللي عنده هالشي عادي فهذا له كلام ثاني

يا ناس الله كرمنا بنعمته ان جعلنا مسلمين .. يعني انا دايما اقول ألف الحمدالله والشكر اني ولدت على فطرة الاسلام وماصرت من ديانه ثانية

ودام الله اكرمنا بهالنعمة الطيبة فلازم نحاول ان نحافظ عليها ونسعى ورا تحقيق العمل في تقوية دينا الاسلامي والتعمق في تطبيق تعاليمه

ترى انا وحده حالي حالكم ومثلكم كل شي عندي عادي مو معناه كلامي هذا اني وحده دينة ومتشدده لكن انا وحده اهتم بضغائر الامور اللي البعض يجهلها ويحاول ان يتحاشاها وما يعمل فيها

فياريت الناس يفكرون شوي باللي يسوونه ويفجون عن هالسوالف وهالاعياد اللي مالها معنى